下月將剖腹生B女既蔣怡（CoCo），今日喺荃灣出席佢幫有線主持既節目《蔣怡前４後６狂想曲》午宴，有線高層曾展章仲將一個有CoCo個樣嘅蜜蜂公仔BB籃送俾呢位準媽媽，點解會送蜜蜂公仔？司儀就解釋因為CoCo老公姓翁，仲爆佢哋幫個女改左個乳名做「翁翁」添！事後懷胎9個月嘅CoCo講起囡囡個乳名，佢話：「名真係未諗，之前同朋友傾開，佢哋都不約而同話叫我個月女做翁翁，加上我哋會同BB傾計，所以就叫住呢個名先。」

CoCo話自己冇諗過幫囡囡擇咩吉日出世，佢話所有嘢都交俾老公搞掂，講到準爸爸唔想個女係靚女，CoCo都贊成：「一嚟怕阻礙佢讀書，二嚟啲大人係咁讚佢靚，佢只會識靚呢個字，咁唔係咁好，我細個都冇人讚我靚，都唔知自己係靚女。」

CoCo笑言已經幫囡囡揀緊男朋友，不過講到揀學校，佢就話交返俾老公揀，又話唔想俾太大壓力囡囡。至於講到生嗰陣老公翁狄森會唔會陪佢入產房同拍DV？CoCo即話：「我想佢陪我入，但就禁止拍片影相，因為我有職業病，有個鏡頭對住我我就一定會keep住笑同講嘢！」