各位男仕，若果要令心儀女神對自己加分，首要秘訣係投其所好之餘，仲要喺不經意間表露自己優點。

陳靜(DaDa)今日就大騷事業線現身屯門，活動上DaDa仲分享飼養寵物經驗，佢話：「養寵物係一生一世承諾，現時養咗一隻9歲大貓貓，原本自己好鍾意狗想養多隻狗，不過貓仔好呷醋，最終都放棄呢個念頭。」

對於陳茵媺近日生B棄貓（其實係送咗俾朋友）事件，DaDa指自己家姐同親戚有小朋友都照養寵物，小朋友身體好健康，將來自己有小朋友都絕唔會放棄家中寵物。

早前佢喺上海探望婆婆時，又喺街上遇到兩隻流浪貓，最後DaDa收留咗佢哋，又有朋友應承收養貓貓。

問佢係咪傳聞中上海男性好友？佢甜笑話：「係呀，呢件事都令我對佢再加分，覺得佢好善良同顧家，希望佢照顧得啲貓仔好好。」

DaDa又透露放緊一個短假，會多啲去上海探婆婆及貓仔，問到會否想男性友人照顧埋妳？佢笑住話：「太長遠，我0依家照顧得自己好好。」

又話暫時同嗰位男性友人了解緊，不過DaDa都表示準備好拍拖，話因為感情生活，能夠令拍戲時多啲感覺發揮呀！


此外，本身養緊兩貓兩狗嘅梁靖琪（Toby）指只要懷孕時唔好接觸貓糞，其實BB出世後，同寵物係可以一切生活，健康成長。Toby下月接拍新劇，今次要著比堅尼出鏡，近日佢勤力打泰拳健身：「為求腹肌盡快爆出，我要求教練打我腹肌求更結實，希望拍攝時畀到最佳狀態大家睇。」