【新增回應】
郭可盈近年鮮有於幕前現身，只係日前出席過公開活動，期間佢提到自己唔會復出拍劇，因為寶貝女林天若（乳名津津）唔會放過自己（新聞連結： https://bit.ly/2BC4I0W ）。

眨個眼，今日係郭可盈嘅49歲生日，日前已經見佢喺微博貼過相慶祝，今日係正日，當然要食餐飯啦！今晚可以陪到郭可盈過生日嘅，除咗有佢老公林文龍同囡囡津津之外，仲有細佬郭可頌、弟婦熊黛林及一對孖女Kaylor同Lyvia，另外仲有其他家人，夾夾埋埋一家大細，有成10幾個人咁多，非常熱鬧！

郭可盈簡單留言話：「我要我愛和愛我的人，每年都一起《共同渡過》！」即係預約每年生日都要同屋企人過，真係好注重家庭。

睇埋佢哋枱面上嘅生日蛋糕，中式西式都有，又有唔同口味，真係食蛋糕都飽。另外，仲有啲相信係較早前郭可盈慶祝生日嘅相，唔知佢今年食咗幾多個蛋糕呢？

咁就祝郭可盈生日快樂、青春常駐，得閒就返出嚟客串吓，等啲觀眾同fans唔好掛你掛到頸都長。

可盈今日講到生日點過，佢回覆《蘋果》話：「生日慶祝活動好開心，每年朋友都好有心，會同我lunch或dinner，食咗好多餐生日飯，切咗好多蛋糕，好warm。正日同屋企人食飯，囡囡不嬲好細心，生日卡一早畫咗畀我，噚日食食吓飯喺背囊拎咗個木琴出嚟，即席演奏咗Happy birthday song，嗰吓覺得囡囡好細心，將樂器放咗入背囊仔，當時聽到呢隻歌份外感動，生日歌聽得多，份外難忘，好驚喜難忘一晚，老公送咗鑽飾，生活點點滴滴永留心中。」

精選娛聞，喺晒《娛果》
http://fb.com/appledailyent