尼斯喺星期日嘅法甲聯賽雖然有巴洛迪利開賽4分鐘已經頭槌入波而領先，加上占舒利16分鐘再入一球，一早已經領先馬賽2:0，可惜主場嘅尼斯由26分鐘開始到臨上半場連失三粒，有一球更加係烏龍波㖭半場馬賽已經超前成3:2。「巴神」對於球隊咁都畀人追番好鬼激氣，半場喺球員通道大力揼塊廣告板嚟發洩，仲口噏噏話「10分鐘失咗三球，真係見鬼」！

可惜「巴神」呢個舉動對尼斯並冇幫助，下半場只係踢咗3分鐘佢哋就再失多一粒，雖然對方有路爾斯古斯達禾喺67分鐘被逐而踢少個，但對結果都係冇影響，尼斯最終都係輸2:4，喺法甲兩場不勝，目前以8戰3勝1和4負得10分排喺聯賽榜第10位。