韓國男團Epik High主音Tablo跟女星姜蕙姃所生嘅囡囡Haru，曾演出親子綜藝節目《超人回來了》而為人所識，雖然Haru離開節目後少咗上鏡嘅機會，不過佢都有個Instagram帳戶，不時公開近照，而現時已經7歲嘅佢更係大個女，除咗追上潮流染髮外，更非常識得於鏡頭前擺甫士。

近日Tablo一家三口就去咗美國度假，Haru密密於Ig公開新相，當中包括佢於沙灘穿上迪士尼動畫《魔海奇緣》（Moana）女主角慕安娜嘅服飾，舉V大晒甜美笑容。

7歲嘅Haru除咗跟一般女仔一樣會扮吓迪士尼公主外，近期開始以流行造型影啲唔望鏡頭、露出cool樣表情嘅相，跟Ig紅人常用嘅甫士差唔多。未知係唔係因為父母都係藝人，加上爸爸Tablo係YG藝人有關，身邊圍繞一眾潮人嘅Haru，早前更漂染粉紅色髮色，由乖乖女造型變成潮味十足嘅星二代，絕對有潛質當Ig紅人。