「檸茶走檸」，如果觀眾拋咁樣嘅古怪意念出來，演員幾秒間要度好對白，建構劇本，純即興，無得NG無得Pause，真係要魯芬急轉彎先得。短篇即興劇場香港一直有人做，有班人就打算挑戰做長篇。即興劇場演員童日陞（司馬丁）說：「想有個故事結構，起承轉合。」他與幾位腦筋可以扭擰伸直的朋友組成「含笑半步Jam」團隊，即將演出沒預設劇本，靠現場爆肚的即興劇場。「一晚之間，可以從愛情橋段到上太空，再穿越古代都做齊。」演員之一周千業（TT）說。
到底呢班人憑乜戰勝無稿恐懼？「你要有嗰份自大，要有盲點覺得自己係得嘅！」吓，即係自我催眠？當然無咁簡單。司馬丁說：「一星期練足三次四次五次，練到有默契，free fall都唔驚。越花心機，你越唔敢自大，你見人哋好似好易做到，只係因為下咗苦功。」你必需非常用力，才看來不費吹灰之力，要有「功」，無「日子」點得？「重睇演出片段，有時都覺得好難睇，但都會逼自己睇番，睇吓點改善。」

如果觀眾冇反應，甚至露出煩悶面口，好難頂箒。「我做咗五、六年棟篤笑，見過觀眾玩手機、恰眼瞓。做即興已經好好，有對手同你一齊面對，做棟篤笑得自己黯然咋。」即興劇場每一步都似踩鋼線，永遠唔知下一秒會唔會踏空，好彩有拍檔補位。TT說：「有時虐待對手先有喜劇感。」司馬丁補充：「方丈份人要有啲大量，俾佢整蠱，又整蠱吓佢。」

表演日期：10/6、24/6@油麻地德昌閣仔
票價：$118（包一杯飲品）
facebook：含笑半步Jam

記者：葉青霞
攝影：劉永發

2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily