財經演員畀人嘅印象，通常係唔會得罪人，尤其係上市公司或監管機構，唱好上市公司嘅就多，67歲嘅智易東方證券行政總裁藺常念忽然老馬有火，噚日po文炮轟港交所（388），俾私有化咗嘅公司，拎番舊業務再上市，佢仲點名提新福港（1447）同承達（1568）就係私有化後再上市嘅例子。
藺常念喺自己facebook以「港交所扶持厚顏無恥的企業家」為題po文，指本月特別留意到兩間做建築生意嘅新股，分別係新福港與承達，覺得似曾相識，查問之後發現兩間公司係私有化後再上市。

港交所：無規則禁止

藺常念呢篇文做足資料搜集，指承達曾於2009年上市，當年冧巴係2288，後來喺2012年賣殼，建築業務就賣番畀母公司，家陣母公司再將建築業務上市。而新福港亦係高價上市後，股價向下炒，2003年股災後，低位私有化，𠵱家趁市旺又上市。
華華搵來藺常念問佢做乜忽然發火，仿似正義超人上身，佢就話純粹係「睇唔過眼」，質疑：「佢哋（監管機構）冇保障投資者，由得啲公司橫行無忌，上（市）完又上（市），完全冇做嘢！」證監會與港交所絕對有權阻止呢類情況發生，只要出聲，啲公司就唔敢亂嚟。
不過佢有佢鬧，港交所方面就回應話，𠵱家上市規則冇禁止上市公司將已私有化嘅資產再上市，但係就算港交所批，公司都要獲足夠投資者支持，先可以成功上市。照咁講，投資者都係要自己睇清楚，買錯股就只能怪自己了。

李華華
mailto:[email protected]