又越過高山又越過谷，在呃like文化下，每逢假日，大東山變成「MK山」，九十後美少女Gasha三年前由素人變身山野型女，每星期行山一次，更設立fb網頁，上載行山靚相，吸引近二萬like，Gasha除了報讀山藝課程，行山前更準備充足，避免意外發生，她坦言城市冷漠，但在山頭中卻充滿人情味。

行山熱潮由去年掀起，今年達至極盛，但「個個都行山，唔通個個都鍾意行山咩？」Gasha三年前初接觸行山就是充滿嫌惡，每次當時男友著她一起行山，內心總是一萬個不願意，「反而分手後，有一次同朋友去西貢海下，望住眼前美景，有叮一聲感覺，反問自己點解以前唔識欣賞，於是就喜歡這個活動。」從前放假只想宅在家，到現時每星期都要出外行山，是大自然的景觀改變了她。

平日在交通工具上盡是低頭族，一幅幅的電話屏幕築起了人與人之間高牆，令城市變得冷漠，但回歸大自然，碧山綠水，心情自然開朗，「假日平日上山，見到前前後後無論是香港人、內地人或外國人，大家迎面行都會講聲早晨，而且唔會拎住部電話，我覺得呢樣嘢好好，我覺得城市應該係咁。」

Gasha每次出動，都會在山頭拍下居高臨下的靚相，放在其行山專頁內，但與一般行山呃like者不同，每次行山前都會有充足準備，「每一次行山都會plan起點，點樣搭車去、在中途邊啲位有補給點、邊啲係撤退位置、終點及撤退位置相隔幾多？我哋要衡量計算，出咗路線圖後就會派畀其他同伴一齊研究，或畀佢哋知道，萬一失散咗可以點行。」而且更會帶備足夠糧水及頭燈，以防時間上失預算。

曾經試過挑戰相傳是考牌路線的「杯靈雙渡」，即由杯渡山至靈渡山，全程約十小時，但結果時間失預算，經商量後決定撤退，絕不逞強，「仲有一個山頭仔就完成，但個天已經黑，同行有個前輩唔建議我哋繼續行，行山真係唔可以高估自己，即使就快到終點，但若碰上環境因素影響，或身體上因素，都不能強迫自己繼續行，因為真的好危險。」

安全第一，她亦坦言不會為影相而揾命搏，因為每次都是靠鏡頭去就位，營造出居高臨下感覺，亦呼籲大家小心別輕信石頭承托力，「有時見到嚿石頭以為好穩陣，但可能會好危險，你企上去，郁一郁就已經成嚿跌落去。」

記者：金敏琍

你敢爆，我敢獎！ 即Call《蘋果》24小時爆相爆片熱線 ：63836568