萬眾期待嘅劉德華跨年紅館演唱會「My Love Andy Lau劉德華World Tour-Hong Kong」今晚正式開鑼，點知就係臨開場前，有紅館職員疑因有人手持黃牛飛入場，逐報警處理，警方到場調查事件。

現場目擊有5個人正喺紅館外同警員理論，有一男子表示原本在網上買咗5張貴價黃牛飛，每張近萬港元，但唔見咗兩張，其後再以3千幾蚊港元一張價錢買入五張黃牛飛，總共花約6.5萬港元，該批歌迷聲稱有轉賬紀錄，能證明曾經買過飛。入場後該批歌迷想坐原先貴價黃牛飛座位，持飛進場時向職員查詢解決方法，結果職員報警，警方到場調查。另外，現場亦傳出有歌迷買到假飛，華仔公司回應《蘋果》指：「是有此事。警方及紅館票務已處理。」

其實華仔自公佈舉行跨年演唱會之後，排隊黨已經引頸以待，結果喺9月4日正式公開發售門票之前，因於發生咗柴灣青年廣場有排隊斬人事件(新聞連結： https://bit.ly/2wpg2d8 )，結果主辦單位為杜絕排隊黨，破天荒宣佈劉德華演唱會不設售票處買飛，只設網上、流動應用程式、信用卡電話訂購。

賣唔到飛嘅fans，或許會嘗試用唔同途徑去買飛，所以黃牛黨繼續有生存空間。而早前民政事務局交考慮以修例同行政措施打擊「炒黃牛」，包括建議減少內部認購比率、以實名制購票，以及將紅館、伊館等熱門政府場地，納入《公眾娛樂場所條例》，如日後炒賣紅館門票，將會觸犯法律。

精選娛聞，喺晒《娛果》
http://fb.com/appledailyent