「豹子頭」及「逍遙自在」均配何澤堯打韓戰，反而潘頓、雷神留守大本營，好明顯心中有馬。其中，潘頓座騎「怡昌寶寶」係全日焦點所在，另外「勁快步」落班上陣，贏馬機會同樣樂觀。

周日（8日）第一場五班泥地1200米：相信係「勁快步」與「洪荒駿駒」單打獨鬥局面，兩駒較為有賽績狀態根據，馬膽屬意「勁快步」，上季尾越跑越差，大致上可以解釋升四班對手嫌強，最後一戰在谷草一哩大敗，擺到明志在減分。

距離上仗接近兩個月，有充足時間回氣，8月尾試泥閘，出閘三兩個箭步已經跟前走，直路從容不迫直奔終點，無論落腳姿態、鞍上人手勢，都說明大把在手，落班重召潘頓執韁，抽6檔進可攻退可守，戰術運用方面更可多變化。

「洪荒駿駒」唞夠才復課做工夫，埋門試閘對辦，最後試跑再拍多課，工夫完整無缺，用薛恩可望分多兩蚊。

第八場二班泥地1200米：「皇龍大將」、「怡昌寶寶」、「仁者荃心」及「年年旺」都係試閘快跳譽滿欄邊之馬，但「怡昌寶寶」級數明顯勝一籌，在港兩戰未逢敵手，姿態有目共睹。

這匹1,200磅大馬，步大力雄容易上口，晨操快跳潘頓摸住唔放手，經常見要紮行馬曲尺手才拉得住，非一般助手能駕馭，反映出級數及能力。

年稚馬只要日後稍為收斂識得留力，好有機會向級際賽進軍，專登避開剛周日（1日）特首盃，退而求其次揀二班泥地賽，就係貪對手弱兼可汲取更多經驗，預計出閘最快應聲彈出，如無意外可安車平五路。

「仁者荃心」今季晨課再無火車頭滑水式拉唔住鏡頭出現，未能入選征戰韓國，留港上陣亦未必係壞事。

-------------------------------
想唔想知自己財運、事業、愛情會點？參加《玄機解馬》節目，可免費畀美女堪輿學家唐碧霞睇八字、睇相指點迷津，快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此