【本報訊】西貢炸藥案中，有被捕者自稱屬全國獨立黨成員。該黨facebook的原有專頁，其中一名編輯人員聯絡本報記者，澄清該黨「得個名，有名無實」，組織結構鬆散，估計只是有人另設行動組，更不排除中間有「內鬼」。有關專頁及群組目前已全部被人刪除，他不清楚新成立的專頁由誰控制。
專頁編輯之一阿蕭（化名）表示，自己去年底在高登討論區看見有人研究安全通訊，身為IT人的他遂加入群組，「當時未係呢個名，大約叫做中港台華人民主討論小組，有人話個名水蛇春咁長，跟住就出咗全國獨立黨」。

不排除有內鬼

阿蕭估計有人透過群組認識，繼而有所行動，並懷疑他們另設群組討論，「有時個page有啲改變同埋文宣，係喺我唔知嘅情況下出現」。他從未見過任何成員，指大部份人的圖片都用台妹相或雨傘圖案，「（被捕者）係咪『黨友』都冇任何證據」，又指不排除有內鬼混進其中，「有screen（篩選）過吓的，要你講吓政治取向同埋貼證件。有心做鬼點會俾佢screen到？」
對於網民嘲諷起獲的文宣貼紙將雨傘本土並存，以及起用回歸等本土派否定的字詞，阿蕭表示未見過該批貼紙，但可能確實由該班人操刀，「最搞笑係搞手唔知史實，以為六四屠城之後先有百萬人大遊行」。
作為專頁編輯之一，他不諱言擔心警方找上門，「我有諗過警方可能搜我屋，不過我乜料都冇，冇嘢可以入我……都緊張過一陣，我係咪應該delete（刪除）咁啲四仔先」。
■記者馬志剛