韋達季後掛靴下季轉任大摩副練傳到火紅火綠，當事人回應唔承認亦冇否認，令人更加覺得傳聞唔係流料，雖然馬會CEO應家柏日前話冇收到任何申請，但距離季尾牌照委員會審批下季牌照仲有一段時間，要入紙唔急在一時。

暫時綜合外界嘅反應，似乎大部份人都睇好十三少做得成大摩副練。

自從韋達同蔡約翰減少合作後，佢已唔夠支持再挑戰冠軍騎師寶座，經常有傳十三少會開倉做練馬師，十三少每次被問及係咪想做練馬師，通常都係話未諗過結束鞍上生涯。

十三少今季支持進一步減少，剩低嘅大部份係有多年緊密關係嘅嫡系座騎，其實十三少已經名成利就，對成績亦唔使太上心，或者佢都係等緊轉職幕後嘅機會。

從化馬匹訓練中心喺今年暑假就會正式啟用，聽聞屆時上去設倉嘅練馬師，都會多一個副練駐喺當地，若韋達出任大摩副練，極大機會係幫大摩管理從化嘅馬房，而非香港嘅馬房。

韋達話晒係冠軍人馬，肯紆尊降貴去從化做開荒牛，加上十三少教馬操馬嘅能力，絕唔係一般騎馬人可比，大摩自然樂於有十三少幫手。

對十三少嚟講，稍後從化訓練基地啟用，亦真係難得機會，若能夠把握時機浸番三兩年，將來正式開倉嘅機會真係好大。

始終韋達喺香港策騎咁長時間，一直聽聽話話，冇特別離譜嘅策騎紀錄，亦符合馬會要熟悉香港賽事模式嘅要求，13屆冠軍榮譽當然幫佢加唔少分，唔難好似告東尼咁退休後轉職練馬師。

其實馬迷呢兩季對韋達嘅座騎都好難取捨，經常擔心佢錫身，若然韋達下季順利轉職副練，或者對各方面都係樂見嘅結果。

阿Joe