動畫《玩轉極樂園》（CoCo）喺奧斯卡連奪「最佳動畫」同「最佳歌曲」起雙飛，有份為中文版《玩轉極樂園》配音嘅鄧建明（Joey）接受《蘋果》電話訪問表示：「好開心，《CoCo》贏到對於我嚟講係一件都幾意想不到嘅事，因為電影配音對我嚟講係幾十年人都未接觸過嘅嘢，嗰時諗住係一個job，點知畀劇情同入面其中一把聲，就係CoCo婆婆細個嘅時候，爸爸走之前夜晚唱歌畀佢聽，嗌嘅一聲『Pa Pa』吸引咗我，因為好似我個仔細個嘅聲。」

所以Joey決定盡自己所有全力，都要成功爭取為《玩轉極樂園》配音：「其實要經過casting，我盡全力通過兩次測試先做到呢件事，希望第時留個回憶畀我個仔。」Joey更大讚《玩轉極樂園》出色：「入面所有畫面都好感人，家庭嘅一切都好正面同好打動到人，所以佢攞獎係應得嘅，所以我更加想喺4月太極演唱會唱一次《Remember me》畀大家聽，恭喜晒《CoCo》，恭喜晒《玩轉極樂園》。」

許志安就說：「好開心，自己好似有份咁，其實應該有份，因為廣東話版《Remember Me》有份配唱，現場播出攞獎時，自己都好高興。

「呢部電影好出色，入面講到親情關係，睇一部電影可以反思，感受到愛同力量，實至名歸攞獎。諗返轉頭知道要參與電影，聽到呢隻歌原裝時，就諗如果畀我會點演繹呢？成個故仔帶出愛訊息，會好touching。」

精選娛聞，喺晒《娛果》
http://fb.com/appledailyent