財爺派糖，今到好多人燃起買樓念頭，blowater喺《Uwants討論區》列出自己每月支出，問其他網友究竟兩個人月入大約2.5萬元，會唔會每個月用8000蚊嚟供樓？網友嘉輝認為：「咁辛苦唔會啦。儲多啲錢投資啦，𠵱家樓價追唔到個市，萬一加息，又要畀多千幾。」
不過，whitemel話：「慢慢來，我都有打算買樓，不過我仍然無乜信心𠵱家買樓。自己都有買基金、股票，睇番過往投資，每年最少有15%回報，如果用供樓嘅每月8000蚊投資，年底回報應該好過買樓。
講真，供樓開頭嗰幾年都係主要供息，供好少本，今年啲專家話樓市會升5至10%，咁我不如等多一年半載先考慮入市。」

好容易使埋供樓錢

新用戶則提醒話，「我嘅經驗，唔供樓，啲錢會好快唔見咗。你會有一萬個理由去使錢。供咗樓，你會乖乖地使少啲。」TheBus就最直接，「大哥，啲人話投資，你得8000蚊預算，唔買都要租啦，不如乖乖哋買樓，當儲錢，好過使咗去啦。」
以blowater月供8000蚊，佔入息32%，唔算太高，亦唔算低。兩個人每個月剩番萬七蚊，開門七件事都用咗唔少，如果仲要畀錢屋企人，咁就更加緊絀。當然，每個人都想擁有屬於自己嘅安樂窩，咁最好再預鬆少少，將來有乜變化都比較容易應付。