寶珮如今日獲悉黎小田病逝,即在facebook貼相悼念,她接受傳媒訪問時,大講相識經過:「我入行參加歌唱比賽認識Michael哥(黎小田),我跟住出唱片,佢教導我好多嘢,係我恩師。我哋又合作拍過亞視劇集《第三間電視台》。當年我簽咗畀陳淑芬,Micheal哥又係製作人身份,我第一次去潮州出埠唱歌,都係佢帶我去。我撞車後停過演出,但離離合合又撞番,最近就係上佢主持嘅《流行經典50年》。今日知佢病離開,好惋惜,佢係資深音樂人,好肯教後輩,上次我唱歌,佢有評我『滑口』咗,有提點我唱番啲年輕啲嘅歌,希望佢一路好走,永遠懷念佢。」寶珮如指印象中的黎小田少說話多做事:「佢工作時唔多講嘢,但好投入,工作唔會大聲話人,好識得去包容同保護新人,唔會令佢哋影響到情緒,我曾親身感受過,好感恩認識到佢。」