當年今日

講心嗰句之二:我唔介意跪低落Order!

蘋果日報 2006/07/25 00:00


做乜跪我啫?入「和民」開餐,相信好多客人都有呢個疑問,咁跪喺度嘅侍應又點睇呢?Daisy話:「啱啱返工要我跪住落單都有少少唔慣㗎,不過公司規矩我要接受。其實呢啲只不過係日本文化,日本『和民』一向都係咁做,『和民』啲枱又設計得比較矮,企喺度落單好唔方便,我踎低身大家就可以平望,感覺親切好多。」
答得咁官腔嘅?講啲真心話得唔得?「試過有次幫一家人落單,個爸爸話要試吓踎低身嘅感覺係點,之後就真係踎喺地,嗰陣唔知點解我好感動呀。」放假,會唔會幫襯番「和民」?「會。」會唔會好想同事跪番自己轉頭?「又唔會咁諗,都話咗呢個只不過係日本文化咯,一旦接受咗就覺得好正常。」賣廣告時間到,畀啲版位你推介嘞,「近排經常同朋友食幾款夏日菜式,冷麵、芝士豆腐同埋新口味Pizza好正。吖,唔講住,我要去落單喇,再見。」
記者:黃若茵
empty
和民侍應
Daisy
刺身盛岡冷麵$38
大大碗,有甜蝦、帶子等刺身選擇,加泡菜同韓國辣醬,酸辣湯底放入幾粒冰,包你食到最後一啖都咁涼爽。
empty
明太子芝士豆腐$28
細細件一口豆腐Size,咪一啖質入口,皆因面層布滿熱辣辣香軟芝士,好易辣親嘴仔。細細啖咬,香濃軟滑先最正。
empty
鮭魚白味噌比薩$38
望落去件Pizza好薄,以為無乜料到,入口先知好足料,鮭魚肉厚唔在講,仲有咬到嘞嘞聲嘅蟹子,夠飽肚。
empty
食客點睇
Dorothy:「成日嚟『和民』,知道跪低落單係配合日本文化,咁樣做無乜唔妥吖。」
empty
嘉嘉:「香港人可能會抗拒,但去日本食嘢都係咁㗎啦,呢種文化唔難接受喎。」
empty
和民居食屋(31562567)
地址:尖沙嘴新太陽廣場地庫B09號舖