27歲已在港大教書，無名新丁單挑醫學院教授，鬧出「搶屍風波」。
男人四十，遇上89屠城，別人移民，在美國生活多年的他，卻舉家回流香港，創立香港人權監察，「隔岸觀火有鬼用。」一面不屑。
最激一役，要數十年前沙士期間，他以哥倫比亞大學流行病學教授身份，踢爆楊永強「總有些人要犧牲」的言論，激起千重浪。
「做對的事，就唔怕得罪人。」65歲，得罪人多，但老馬有火。這團火，仲燒足40年！
記者：呂麗嬋　攝影：梁志永

吳錦祥這個人幾妙，明明是醫生，卻喜歡說故事，連珠炮發，一笑，卻像個老頑童。本身是流行病學專家的他，在美國生活多年，香港人對他不熟識，只知他是十個佔中「死士」之一，以為只是尋常老醫生，但其實他來頭甚猛。十年前沙士，他還在美國哥倫比亞大學兼任流行病學教授，面對不明世紀病毒，以專家身份與楊永強及董建華會晤，簽訂保密協議，協助研究淘大花園爆發源頭。
殊不知低調研究，卻高調發難，踢爆楊永強隱瞞疫情，惹火教授，一夜成名！「嗰時傳染途徑未明，污水、老鼠，甚至蟑螂，都有可能。我認為要向外公佈調查進度、擴大封閉範圍，楊永強話唔好，擔心引起恐慌。科學家應實事求是，我引述佢話總有些人要犧牲，講嘅都係事實。當年喺醫學期刊《刺針》，我都發表咗篇關於沙士毒源嘅論文，你可以睇睇。」說起陳年往事，毫不含糊，這便是吳錦祥。

「我係嗰種我要十，就一定企硬要十嗰種人，咩都爆出嚟先算，好多人叫過我參政，但我自己知自己事，做得政客，就要妥協，講得衰啲，係我唔想委屈自己。」九十年代開始活躍政經界，人脈甚廣的吳錦祥，現為亞洲分子診斷有限公司總裁，推廣婦女子宮頸細胞檢查。早年的生意夥伴，據知正是李嘉誠的紅顏知己周凱旋，「大家道不同，推廣抹片化驗賺唔到咩錢，06年已拆夥。」
大茶飯不食也罷，近年半退休，周遊列國，怪不得他公開表態參加佔中，不少政經中人都說他「重出江湖」，「有啲嘢，覺得啱就做，錢，永遠搵唔晒。」記者到他位於火炭工業大廈的辦公室，四周掛滿字畫，「呢幅字畫係我六四後決定回流香港生活，華叔特地寫畀我嘅：『江天如墨我飛還，折梅不畏蛟龍奪』，係龔自珍嘅詩句，意謂個天咁黑你都返嚟，要好似枝梅花咁，腰骨要夠硬。」
這股硬骨頭，三歲定八十。三歲喪父的吳錦祥，與母相依為命，從小，他就立志做醫生，小學年年考第一，升中考上傳統名校喇沙書院，過關斬將，入讀醫學院，有人覺得飛上枝頭，他卻覺得要「還」！「嗰個年代，唔係個個有書讀，我係既得利益者，入到大學，如果只顧自己，我覺得對唔住個社會。」成為鬥獸場的倖存者，在石硤尾寮屋區長大的他，珍而重之。
「港大係殖民地色彩最濃厚的大學，五、六十年代，讀得港大，大都係屋企有錢的公子哥兒，我67年入學，係港大平民化的里程碑，嗰年開始推出助學金，幫助一啲考到入去但又冇能力交學費的清貧學生，鄭宇碩係低我兩屆的大學師弟，湯家驊同我一樣，72年畢業，第一屆法學院畢業生。呢個年代的大學生都有一個共通點，就係遊走於貧窮與富裕之間，面對社會種種不公義，好激情。」
生於火紅年代，吳錦祥的公平意識特別強，對特權分子，他深痛惡絕，「殖民地時代有幾唔公平，只有嗰個年代嘅人，都會有一番體驗，我唔怪𠵱家有啲後生仔喺度舞動米字旗，佢哋根本冇經歷過，只因對現實不滿，借題發揮。喺我讀大學嘅年代，大教授都係外國人，中國人幾叻都好，永遠做唔到department head，嗰時反貪污、捉葛柏，仲有爭取中文合法化運動，時代唔同，講到尾，都係希望個社會公平啲」。
72年醫學院畢業，他在瑪麗醫院當駐院骨科醫生，「七十年代，香港仲係高度工業化的城市，每日，都有好多工廠工人因為工傷嚟醫院睇病。事隔40年，有一個個案我到𠵱家仲記得，我收咗佢三次，三隻手指頭都被削去一小截，我見到，好火滾，我問佢你有冇搞錯？你咁唔小心，有冇諗過你嘅屋企人？佢苦住臉同我講：我就係因為要養家，所以先要搏，一打打計錢，放粒膠入去，用鋏慢好多。」
「我聽到佢咁講，想駁佢又駁唔到。講得老土啲，呢啲唔係佢嘅錯，係社會嘅錯。嗰時我就開始反思，我繼續做落去，一年駁一百隻手指、兩年駁兩百隻手指，咁有咩意思？」74年，港大開辦社會醫學部，一心「改善社會」的吳錦祥，二話不說返回母校教書，成為當年最年輕的講師，「社會醫學部係公共衞生學院的前身，以前呢個科由醫務衞生署署長兼教。」
醫學院最多大教授，論資排輩，但當年仍是新部門講師的吳錦祥，卻年少氣盛，屢因「冇大冇細」得罪人。「嗰時港大討論學生加入教務委員會，醫學院好保守，只有我同一個美國來的教授投贊成票，我發言時仲好寸，反駁謂如果覺得22、23歲的學生太幼稚，我唔大得過佢哋幾多，應該都冇資格喺度教書，即時已有幾個教授面黑。」醫學院最終否決學生加入，但同年其他學院通過方案。
特立獨行的作風，在醫學院早惹爭議，致命一擊卻是一次「爭屍風波」！「東華三院每年都會捐屍體畀醫學院解剖做研究，嗰時停屍間約有120條屍，有個教授喺例會話日本醫學會想借用殮房啲屍體做研究，我覺得咁做明顯違反東華捐贈原則，於是寫咗封信畀醫學院，講明原委，仲話好多同胞生前經歷過日本侵華國難，死後再要被日本人刺刀解剖，實在可悲。」由捐贈原則講到民族大義，自言「冇得輸」的吳錦祥，說起40年前的舊事，哈哈大笑，像個造反有理的老頑童。

「嗰時壁壘分明，大教授幫大教授，我哋啲講師仔就幫番講師仔，咁講真，低級教職員數目梗多過高級嗰啲，一人一票，結果係51對49，賣大包捐屍畀日本人方案拉倒！」偷襲起義成功，吳意氣風發了一陣，但醫學院內的牙齒印就越來越多。「教咗兩年書，一啲都唔開心，由細到大最憎特權，偏偏舊殖民時代嘅港大，最多特權分子，學院主管只有西人先可以擔任，部份樓層的休息室，也只有教授級先可以使用。」
在醫學院被標籤為「搞事分子」，加上「社會醫學」當年在亞洲地區不受重視，年少氣盛的他決定出走，「好多嘢睇唔順眼，教咗兩年就頂唔順走人，去咗美國讀書，我嗰時嘅心態係，香港話晒係中國人嘅地方，既然喺中國人嘅地方做二等公民，咁不如去外國人嘅地方做，起碼條氣順啲！況且美國氣氛好自由，係一個好崇尚公平主義嘅地方。」
76年離港到美國，攻讀他心儀的公共衞生及流行病學，86年完成博士學位後留在哥大任教。在美國娶妻生子、生活了十幾年，89年天安門運動，改變了無數中國人的命運，原本隔岸觀火的吳錦祥，在大時代下也不能倖免，六四期間協助黃雀行動，擔保民運人士在美國申領學生簽證，認識了今次力邀他「出山」的朱耀明牧師，也認識了後來成為知交的華叔。
「衝擊好大，身在美國，感覺好難受，唔想隔岸觀火，好想實際做啲嘢，但又唔知可以做啲咩好。」擔任美國香港華人聯會主席，90年開始連續三年自費到瑞士日內瓦，出席聯合國聽證會，以美籍華人身份，關注內地人權情況。91年，香港舉行歷史性首次立法局直選，身在美國的他，又發起成立「毋忘香港根」民間組織，組團回港投票。
「人權係普世價值，超越政治，在內地生活的中國人唔能夠暢所欲言，香港有佢嘅特殊性，我覺得我有責任為佢哋發聲！」90至93年，因為六四事件，香港掀起移民潮，做了十年海外遊子的他，反叛依然，選擇逆流回港。「正正因為大時代，好想返去中國人的地方。」94年，他與羅沃啟等有心人創立「香港人權監察」，在大世界走了一圈，又回到他的出生地。而今次，他則選擇走進中環，由後方站到台前。
「佔中，我冇考慮好耐已經答應，陳健民同朱牧，都係相識多年嘅朋友，我知，以我嘅性格，冇參與其中，一定會後悔。況且我今年都65，呢件，隨時係我為香港做嘅最後一件事。」「沒有無緣無故的愛，也沒有無緣無故的恨。」是毛澤東的名句，叛逆醫生流露罕見的柔情，他說全因對這片土地愛得深切。