呢日亞視盃賽馬日，有唔少馬都喺上年同日跑過，熟口熟面，當中包括第九場二班1000米一放到底之「兵威振」。此駒去年亞視盃賽馬日由韋達連捷於三班直路賽，之後唞足一年，等到今日第九場先至再跑，結果喺老拍檔韋達胯下，初跑二班沿住外欄一放而回，保持在港三戰全跑直路賽不敗金身，連同在澳洲兩戰全勝，五次贏馬例贏對手一馬位以上，兼且成為今日最熱頭馬，獨贏只1.55倍，中咗得啖笑！
賽後笑得最開心係「兵威振」馬主李皓玲，事關佢家翁有鞋王之稱嘅LeSaunda老闆李子彬，同日第二場先搵韋達幫「時來風送」打開今季勝門，兩翁媳最終合力炮製出一口同姓孖寶，光耀家族門楣！