在英國修讀物理治療的二年級學生衞小姐,昨偕姓陳女同學返港。她們說花約7,000港元,由英倫直航回港,雖然機票價格較平日約4,000多元貴近一倍,但仍感慶幸,「好彩買得快,我有朋友遲我一個鐘買機票,已經要兩萬元。」衞小姐稱,她們決意回港,主要因英國當地防疫意識較差,「英國嗰邊冇乜人戴口罩,每日確診數字不斷上升,但外國同學見到停課就話去social、去gathering。我寧願返嚟自己隔離,都唔留喺嗰度!」
兩人均身穿全套雨衣、眼罩、口罩、帽及手套上機,她們形容在航機上各人如臨大敵,全機乘客都是香港人,大部份是學生,「機上個個人都係咁多裝備,平時會有人去廁所,但𠵱家係冇乜人起身,飛機餐亦冇乜人食,廁所冇乜人去」。
另一名從美國洛杉磯回港的港人蘇先生,原定周六(21日)才回港,但得知今凌晨起從外地抵港人士需接受強制隔離檢疫後,也寧願多費數千元,立即改機票由洛杉磯飛馬尼拉再轉機,提前至昨日返抵本港。他表示航班上大部份乘客均穿上防疫保護裝備,但洛杉磯情況恰恰相反,當地「啲外國人都唔戴口罩嘅」。
■記者張培生、沈彥恒