明日（9日）沙田編跑兩泥八草，草地賽用C跑道角逐，戲碼依然好弱，暑期太短應是導致報名疏落的主因，馬匹根本未唞夠，若狀態唔夠水準就去跑，會帶來負面影響，一季流流長，不愁沒有參賽機會。華倉近期成績相當好，今日姚、徐、文及容廐之參戰馬匹實力頗強，可優先留意。

第八場四班草地1400米，「及時行樂」上季由潘頓在同程取勝，造快時間水準甚高，再戰換黃俊減磅可以理解，但始終發揮有瑕疵，末段曾經被困，就這些少失誤，被「巴基之友」後發先至衝贏，輸得不值。

暑期轉投徐廐，由楊明綸一手打理，做足工夫才派遣上陣，試大閘追趕力強，埋門跟「佳運來」拍跳，貼欄主動先走，末段力拼貫注到底，表現甚出色。

騎師競爭激烈，楊明綸經常受傷或停賽，為裝備自己，近期晨課十分勤力，見過佢在個多鐘內連跳七八匹馬。今次能回策這匹實力馬，必全力以赴盡拼，應是穩位望贏之選。

「巴基之友」上季初出也品題揀到，實力無須懷疑，今季亦保持好進度，今仗配田泰安，純粹是個人偏見，顧慮未必能發揮最佳水準，因此駒還稚嫩，韁口敏感須好韁繩操控，故列做次選。

「軒轅齊飛」上季尾同程跟「及時行樂」串Q，復課有完整操練，試閘刻意留後，過終點後湧上有勢頭，早課交賴維銘摸實，輕磅排內檔有助發揮，絕對不能輕視。

「都市神話」有能力，卻因左後腳有傷患，影響成就，上季在同程負於「智愛」，季尾在短途也追近，今季復課受操，嘉年華閘有前有後，狀態明顯復勇，難得潘頓試過肯騎，可介入一戰。「非同凡響」增程會合，可兼顧做腳。