元宵與西方情人節本周五喜相逢，呢個雙料情人節每隔19年先一次，雖然係幾特別，但財經界人士通常精打細算，多數唔打算勁花錢慶祝。等緊Mr.Right出現嘅富豪酒店（078）太子女羅寶文當日就要飛北京工作。
財經界當中，66歲嘅「曹sir」曹仁超出名錫老婆，佢跟太太結婚超過40年，育有一對寶貝千金，對情人節有一番獨特見解，講明當日冇佳餚冇驚喜，事關太太想要嘅，佢都已經有能力畀到佢，認為「對另一半忠誠，先係最好嘅禮物」。

曹sir：講心最重要

曹sir廿歲仔時，喺假髮廠打工期間認識現任太太，之後決心要搵大錢畀對方過好日子，所以轉行做證券，賺到第一桶金先至結婚。
佢話，後生時掛住搵錢，冇做過乜嘢浪漫事，到咗呢個年紀又唔會搞咁多嘢，而且覺得千幾蚊食餐飯好浪費，講心先最重要，「牙擦啲講句，佢想要嘅嘢，我都畀齊佢啦，佢又唔係要遊艇、飛機，嗰日出面咁逼，啲位都係留番畀啲後生仔啦。」
股評人胡孟青亦唔需要用錢堆砌嘅浪漫氣氛，佢認為情人節係「焗」人消費嘅日子，夫妻感情好，日日都係情人節。相反，黃德几就比較豪，打算喺米芝蓮二星嘅Ritz-Carlton酒店天龍軒同老婆食餐好嘅。康宏理財（1019）主席王利民出名多花臣，竟然玩低調，打算在家煮番餐畀老婆嘆。
靚女羅寶文仲等緊佢嘅Mr.Right出現，本周五佢要為愛犬嘅動畫飛上北京工作，聲稱冇特別活動喎，裙下之臣不妨北上探班啦。

李華華
mailto:[email protected]