英國時下最熱爆議題，當然係6月23日舉行嘅脫歐公投，支持同反對陣營近日埋身打緊宣傳戰。而喺脫歐公投倒數約一個月，商務及經濟發展局局長蘇錦樑竟然到咗倫敦考察，莫非係為香港眾志等政團提倡嘅香港前途自決公投取經？

噢，不要自作多情去做夢，試問邊個高官敢掂阿爺嘅禁忌？查實Greg蘇到訪倫敦一大重點，係了解美食車嘅營運模式，皆因香港推行嘅美食車先導計劃，本月30日截止申請；政府若然想搞得好，都要借鏡外國經驗。NationwideCaterersAssociation代表呢次就陪同Greg蘇同經營者會面，了解美食車嘅日常運作以及該會提供嘅系統同支援等。

除咗美食車，Greg蘇同時參觀華納兄弟片場同單車製造商BromptonBicycleCompany，仲同當地中國商界、設計及時裝業界代表會面，就創意產業交流意見。