韓國MBC王牌綜藝節目《無限挑戰》，於2005年開播以來一直大受歡迎，不過節目靈魂人物兼導演金泰浩早前離開節目，加入新導演後令《無限挑戰》作出大改革，最終《無限挑戰》進入休息期，改為季度制播出，一眾元老成員包括劉在錫、HaHa、朴明秀等與節目共同進退，齊齊唔演出接檔嘅新節目。而一眾成員噚晚完成最後一集嘅錄影後，一臉可惜地現身慰勞宴，而《無限挑戰》第一季最後一集將於聽日播出。

金泰浩導演今日就《無限挑戰》終映一事受訪，坦言唔太鍾意傳媒以「終映」一詞形容節目完結，續指要維護節目嘅新鮮度真係好難。提到長久以來嘅拍檔劉在錫，金泰浩亦大表感謝：「劉在錫一直好支持、鼓勵我喺節目推出新環節，如果冇劉在錫，亦可能唔會有《無限挑戰》嘅存在。」至於觀眾最關注嘅「幾時有第二季」、「第二季係咪原班人馬成員繼續拍攝」等問題，金泰浩導演表示：「當然能夠開拍第二季係最好，但坦白講現時腦海一片空白，冇題材可以繼續拍攝，需要事先準備好、計劃好再開拍，否則驚觀眾感到失望，所以亦未能準確地向大家表示幾時有第二季。」

更多韓流，喺晒《娛果》
http://fb.com/appledailyent