今日林峯、朱智賢、熊黛林、羅霖、港姐冠軍馮盈盈、陳詩恩等等，去到沙田馬場出席賽馬日。最近喺橫店拍古裝劇《獨步天下》嘅林峯，首次為角色剃頭，今日以新look現身馬場，佢話剃頭後覺得好正同後生咗，就連女友吳千語（千語BB）都覺得佢「好樣咗」，佢仲笑自己頭圓似魚蛋頭。

講到之前喺大台一直唔肯剃頭演出，林峯解釋：「因為同期有幾個工作，剃頭會麻煩啲。」怕唔怕生唔番頭髮？佢話：「唔怕，啲人話再生番嘅頭髮會仲好啲。」

千語BB將去北京拍攝《古劍奇譚之流月昭明》，當中有唔少動作場面，林峯話：「佢仲慘，古裝戲服較薄會凍親，咁現場有武術指導，所以唔擔心。」對於千語BB同偶像王力宏一齊過聖誕節，林峯話：「我都鍾意王力宏。」