李八方online︱攞景定贈㷫？12港人案開審前夕 林鄭到訪飛行服務隊打氣
蘋果日報 2020/12/27 22:30
李八方online飛行服務隊12港人送中林鄭月娥
12名涉潛逃港人8月23日於內地水域被捕至今127日，家屬無辦法見12人一面，其中10人聽日就要喺深圳接受秘密審訊。而喺審訊前夕，特首林鄭月娥竟然「咁啱」喺今日（27日）到訪被質疑「設局」將12人送中嘅政府飛行服務隊總部，讚揚飛行服務隊「專業、勇敢，為政府各部門提供支援」。飛行服務隊上星期被美國商務部列為「軍方終端用戶」黑名單，同林鄭一樣受到制裁。
率李家超黃偉綸坐直升機視察新界北及邊境
12港人涉潛逃但被內地警方截獲，事後《蘋果》曾踢爆飛行服務隊疑尾隨12港人嘅快艇，前香港眾志秘書長黃之鋒亦披露一份疑屬飛行服務隊嘅飛行紀錄，顯示當日早上有兩次行動標示為「P-OPS」（Police Operations），警方被質疑聯同飛行服務隊「設陷阱」，將12人送中，但港府上下都矢口否認。
包括政府飛行服務隊在內嘅政府部門有冇牽涉喺事件之中，相信一直係12港人家屬心中一根刺，市民亦有不少疑問，難怪最新民研顯示飛行服務隊評分跌至有紀錄新低，而喺10名涉案港人即將受審前夕，港府發新聞稿指，特首林鄭聯同保安局局長李家超、發展局局長黃偉綸，一齊到訪政府飛行服務隊總部，坐直升機視察新界北同邊境等地區。
林鄭月娥到訪政府飛行服務隊總部，並乘坐直升機視察新界東北。政府新聞處圖片
讚揚政府飛行服務隊專業勇敢 救急扶危
林鄭仲讚揚政府飛行服務隊專業、勇敢，為政府各部門提供支援，肩負救急扶危嘅重任，又鼓勵政府飛行服務隊繼續無懼困難和挑戰，為市民提供最好的服務。
早前有民調顯示，飛行服務隊評分跌至有紀錄新低，相信都係同12港人案有關；林鄭選擇今日到訪飛行服務隊為對方打氣，唔知係攞景定贈㷫？但堅持施政不以市民喜好為準嘅佢，相信唔會明白12港人家屬嘅心情。
林鄭月娥在李家超及黃偉綸陪同下，乘坐直升機視察新界東北。政府新聞處圖片
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！