遠展（035）瓣瓣業務重秤有價，NAV增值潛力係斷倍數計，兜底期間，好上車。遠展主打祖國房地產及香港酒店業，仲有澳門大型酒店項目，等緊上馬。齋計集團經營中嘅香港酒店，房數過1300間（講緊再添800多間），每間成本唔過百萬，以市價200萬銀再秤，已經增值14億銀。
又遠展講咗幾年，將會推售上海錦秋加州花園5000個單位，每個獲利60萬銀計，遠展再增值30億銀。單係呢兩條數，遠展NAV已經可以翻一番，去到5.5元。連埋上邊馬交項目，最保守計，遠展NAV可以秤到上6蚊，現價（3.43元）NAV折讓係42%。再講，睇走勢，遠展4月到家陣，一路兜底，兜埋另一個半圓，目標價直指4.175元；博佢兜大圓底再破位，目標價係5蚊樓上，現價潛在升幅45%，實情吸引到痹。

澳門祥泰地產（199，前稱祥泰行）今年3月底NAV0.7元，現價（0.45元）相對折讓35.7%，係馬交概念股中，少數仲有NAV折讓嘅股份之一。
祥泰地產上年發行一批近10億銀零息可換股票據，認購者當中，包括基金大孖沙。呢批票據正股兌換價講緊0.44元，應該係祥泰地產中、短期嘅「鋼鐵長城價」。對上星期五，馬交股郁郁吓，唔好高騖遠，短打博佢7%至10%回報，應該有得諗。
錢雋