【新增短片、內容】
社會有傾有講，希望做到大和解，唔再似689年代咩撕裂分化，唔係好啲咩？偏偏一啲深藍陣營，似乎最愛壁壘分明，非友即敵，否則格殺勿論。聽落，係咪好恐怖呢？

特首林鄭月娥尋晚由北京返港，即趕去民主黨黨慶晚宴，唔只出席，仲要破天荒留低食飯，同對待其他黨派晚宴，一視同仁。其後仲捐埋3萬蚊，贊助李華明唱歌。做得係咪too much？睇下大家企咩位置睇，但肯定有班深藍絲極度不滿，即刻展開大狙擊。

名為「林鄭粉絲蝦米煲」嘅Facebook專頁，喺林鄭捐錢畀白鴿黨後發表《公告》，話林鄭上任後，積極推動口中所謂「大和解」、「屢次放生反對派政棍」，其後大數佢不是，「包括不檢控反對派黑金案議員、分開補選以便反對派奪回議席、放行姚松炎入閘等等，令我們一眾原來支持林鄭的粉絲極度失望」，所以專頁已改名為「監察林鄭施政」，聲言會從民間，由下而上「監察」林鄭班子，確保其施政維護一國兩制及《基本法》等大原則喎。

只因三萬蚊，由愛變做恨？有啲恩怨，又豈止一朝一夕？當藍絲組織背後「金主」係鷹派，就算係正常舉措，都會眼冤「零容忍」。到底呢個專頁，係想「監察」定「施壓」？相信毋須多說明，大家都心照。一向硬淨嘅林鄭，唔知抵唔抵得住旁人唔會感受到嘅壓力，繼續走佢和而不同嘅中庸之路？

就連一向鼎力撐政府嘅《HKG報》，亦喺Facebook發出至少兩個po狙擊林鄭。今朝第一個po質疑林鄭舉手捐款前，記唔記得民主黨元老如李永達面臨佔中官司？民主黨又全力支援李同戴耀廷等三子嘅法律訴訟？話呢三萬蚊對政府高官嚟講唔多，但用心如何，就引人太多遐想，含蓄地指「香港特首竟然毫不避嫌，捐款支持策劃佔中的主要政黨。香港人，大家是否有些迷惘？」

可能知道建制派反應越來越大，《HKG報》其後再出po，貼咗名為藍雪寶嘅嘅短片，「藍老師」喺片中咁講：「這麼少，捐三億才對﹗大和解嘛﹗林鄭的衣裳很漂亮，不過下次如果能添配黃絲帶，就更加好看」，仲叫大家睇片，睇吓藍老師點樣「串爆林鄭」！

藍絲下下將人標籤做黃絲嘅「慣常技倆」，竟然套用喺林鄭身上，係咪覺得，有啲寒呢？

《蘋果》沙士15周年系列網站，正式登場：
https://hk.feature.appledaily.com/sars15/ 。