估唔到武漢肺炎大爆發，「紅」咗個世界衞生組織（WHO）總幹事譚德塞（Tedros Adhanom Ghebreyesus）。點解會爆紅？睇佢幾度大讚中國政府抗疫得力，遲遲未將疫情列為「國際公共衞生緊急事件」就知一二。佢被質疑只靠相信中共提供嘅數據，嚴重低估疫情，引起網民不滿，有人喺全球最大請願平台Change.org發動聯署，要求佢引咎下台。聯署由上月31日發起至今，已有超過10萬人支持，包括香港眾志秘書長黃之鋒、民主派立法會議員莫乃光同資深傳媒人潘小濤等。

「抗疫靠佢真係死得」

發起聯署嘅網友Osuka Yip喺聯署內容指出，眾所周知，武漢肺炎去年12月開始爆發至今，都無法控制疫情，但譚德塞拖到上月23號仍然拒絕宣佈將此列為「國際公共衞生緊急事件」，結果短短五日內因呢個病受感染同死亡嘅人數急升10倍，Osuka Yip認為呢個結果同譚德塞低估疫情有相當關係。

八方問過黃之鋒，佢話支持罷免譚德塞，係因為見到中共近年喺好多國際機構進行滲透工作，刻意拉攏好多非洲國家靠近中共，批評譚德塞上任世衞總幹事以來，只識聽中共支笛辦事，對武漢肺炎警覺性極低，更令抗疫工作遲緩嘅港府可以搵世衞做擋箭牌，「全球抗疫靠佢（譚德塞）真係死得，因為佢嘅表現根本唔合格！」

資深中國新聞工作者、浸大新聞系高級講師呂秉權早前亦對譚德塞嘅表現睇唔過眼，直指全球幾乎只有譚德塞盛讚中國防疫有功，可見世衞已由原來一個國際組織淪為中國轄下嘅「衞生部」，質疑世衞現時嘅首要工作唔再係捍衞人類健康，而係服務中國政府。

李八方