好變態！新加坡環球影城「萬聖驚魂夜4」絕對兒童不宜，我衷心地覺得他們「玩大咗」，白天好好地一個可愛純真的童話國度，晚上竟變為人間煉獄，無米奇，無胡迪，無白雪公主，最活潑的都變為最惡毒，最正義的都是最邪惡，仲要搞個全新3D鬼屋，誓要全方位嚇死你。無怪乎官方絕不建議13歲以下兒童入場，因為肯定會嚇壞細路！

城內有四個鬼屋，包括小丑傑克3D遊樂場、晶魂復仇事件、死亡軍營和外星人實驗室。鬼屋連同四大恐怖區共444名演出者都是專業演員，使用超過5,000件道具，每晚使用18加侖假血，嚇鬼又血腥，真是一步一驚心。

「小丑傑克3D遊樂場」是首個要闖的鬼屋，也是今年新推出的鬼屋意念。要戴3D眼鏡入鬼屋咁囂張，因為內裏所有鬼怪化妝都是在黑房中用紫外光燈完成。入到鬼屋，已覺鬼火漫天，加上3D視覺，小丑跳出來時，彷彿連他身上的波點也會衝向我！鬼屋內有廿個不同造型的小丑，要集郵，起碼要在小屋密集式被嚇廿次。老實說，這個鬼屋驚嚇不足，反而活潑可愛，是我想再回闖的鬼屋。