去到日本，做咩最好？梗係學教育局局長吳克儉咁，睇啲靚靚櫻花然後「嘩嘩嘩」啦！行會成員林健鋒上周原來都去咗日本喎，仲喺facebook貼咗「賞櫻」照片。咦咦咦？點解佢隔籬棵櫻花，係喺室內呢？佢笑笑口話，自己唔係外遊、冇時間外出睇櫻花，但既然一場嚟到，見到酒店內都有櫻花，咪唔執輸照相留念一下，繼而又話喎，自己此行冇時間睇書喎。嘩，係咪抽水寸緊吳得掂㗎？唔通係八方諗得太多？

林健鋒話佢今次係以香港代表身份，出席香港日本經貿合作會議，向日本工商界介紹一帶一路嘅最新發展，而此行兩日一夜來去匆匆，有時間都只可以睇下會議文件，唔可以好似吳局長咁，抽到咁多時間睇書喎！噢，睇落點解好似話中有話咁嘅？