胡杏兒早前返咗內地為中央電視台節目《國家寶藏》第二季擔任「國寶守護人」，主持節目兼扮演古代壁畫師。因為聖誕節都要開工，杏兒老公李乘德(Philip)噚日喺Instagram貼出同囝囝Brendan嘅父子合照，留言話好掛住老婆：「We miss you ,See you very soon 」杏兒自己當然亦好心急想盡快完成手上工作，趕返港同家人過節啦！

離開香港最大問題，就係要同Baby Lee分隔兩地，所以老公好貼心，特別整咗樣法寶，杏兒日前喺ig貼咗張相，留言：「老公知我成日要飛，特登訂造畀我嘅cushion，等我可以帶住BB周圍去。由BB出世一個禮拜到一歲，真係好掛住BB細個時個肥嘟嘟面豬登，多謝老公，Love U」

至於杏兒今次擔任嘅「國寶守護人」，之前梁家輝、黎明都做過，而佢介紹嘅文物係「壁紙—農耕商貿圖」，杏兒話：「呢個節目得意在分為古、今兩部分，古代我扮清朝女畫師，亦即係畫呢幅壁紙嘅畫師，畫中有人採茶葉、有人摘生果、有人耕田、有人同小朋友玩，其實好難得，一幅畫呈現晒當時嘅人生活狀況。」

壁紙o依家保存喺廣州省博物館中，杏兒當時都有特登去廣州欣賞下，佢話：「嗰時好多英國貴族會去中國做生意，對中國文化好感興趣，會帶啲中國特式物品回國，最突顯身價就係壁紙，即係牆紙，因為夠大幅，貼喺莊園，顯得好有錢。o依家好多英國古堡都可以找到壁紙。」

杏兒仲話今次任務好特別，同時亦有啲壓力：「因為我全程要演戲，live用國語，另外一part要同張國立老師做主持，有好多資料性嘅嘢要講，順利完成咗之後，覺得好榮幸有份參與呢個project。」

精選娛聞，喺晒《娛果》
http://fb.com/appledailyent