又係雷神贏次熱門！開鑼日（3日）莫雷拉繼頭場勝出蘇偉賢馬房「同得福」後，在第二場五班1600米，雷神以「智有心得」再下一城；「智有心得」出自鄭俊偉馬房，打開在港勝門，單Win及組合獨贏A1分別派53及26.5元，而雷神一開鑼即起孖，火速領先今日騎師王。

現年6歲之澳洲自購馬「智有心得」，原本一直長輸，上季尾開始有料到，前仗初配雷神跑第四，再出換時任客串騎師沈拿進步到第二名。這天新馬季初出回配雷神，刻意留前鬥後，沿途守八九位，直路從外叠殺上，初時一度要等位，最終望空後以勁勢殺上，話贏就贏，衝過晒內叠所有對手反勝兩個馬位，在港跑到第15仗，終錄得首捷。

雷神一連兩場勝出次熱門，獨攬新季度第一口孖寶，兼成為季內首位起孖之人，可謂威風八面，而上季煲魚生粥僅僅贏夠16場頭馬達標的鄭俊偉，亦在新馬季旗開得勝。

第二場大熱門繼續死火，主角2.6倍「馬飛龍」臨尾落飛越賣越熱，跑落卻冇料到，在潘頓胯下大包尾。今場二、三名分別為「阿姆利則」及「超自然」，第四名則出現平頭馬「糖黐豆」及「神電金剛」，四重彩有兩瓣派彩，分別為二萬六千幾及一萬五千幾。