保安局前局長葉劉淑儀（圖）噚日喺立法會財經事務委員會上，火併一位首席助理秘書長，葉劉仲大力拍晒枱咁鬧個官：「你（官員）係咪當我哋儍嘅先？咁嘅態度，開會都冇用啦！」七情上面，就係因為要鬧爆領展。

葉劉一年多前聲稱領展通過專欄作家李兆富對她出言恐嚇，叫佢唔好再搞領展，李最終入稟告葉劉誹謗。噚日會議討論房地產投資信託基金守則，葉劉批評官員袒護領展，話市值升咁多嘅房託基金只有一隻，就係領展，批評政府文件內容扭曲：「人人都知，得一間升（基金）咋嘛，你當我哋儍㗎？一開頭就落閘（唔畀議員詢問個別基金情況），你哋保護大企業大財團之心，昭然若揭，完全唔顧小市民嘅痛苦。」

委員會主席張華峰想做和事老，葉劉即拍枱鬧爆財經事務及庫務局首席助理秘書長鄭嘉慧，厲聲質問佢：「你係咪當我哋儍嘅先？」由於提問時間已用晒，葉劉又趕住走，呢場戲就咁落幕。