【英雄所見樂瞳】曾經女神級 反叛樂瞳最入屋
無綫樂瞳獨家專訪英雄所見樂瞳乾物女皇
現年31歲嘅樂瞳,2006年因為參加《美女廚房》而為人熟悉,樂瞳仲做過歌手出過唱片,不過期間就換咗幾次唱片公司。
喺07年加入大台簽約成為選下女藝人,初初因為細細粒把聲又夠溫柔,所以成日被安排做女主角身邊嘅婢女之類嘅角色,直到《少年四大名捕》中凌小刀一角大獲好評而加重咗唔少戲份,2011年《點解阿Sir係阿Sir》飾演反叛少女而正式入屋,仲被網民追捧做女神。
由出道開始,樂瞳形象可以話係百變,由純情小鴨鴨到叛逆MK妹,由古裝到泳裝,可以話係乜都試過晒,不過唔知點解近年由第二女主角慢慢又去返以前嘅位置,有感被投閒置散,所以今年樂瞳就的起心肝離開大台,決定出去行番個圈,更計劃拍電影,走入大銀幕。
【其實樂瞳都係一個「歌手」】
見樂瞳近日頻頻做運動操弗自己,係咪想喺大銀幕做打女?佢話:「近日我睇咗《神奇女俠》,打得睇得,出嚟效果好型,如果我打得好身手,又拍得靚,我唔介意少少性感,我好想朝呢個方向,少少動作新嘗試。」
其實大家都淡忘咗樂瞳出道時做過歌手,先後出過《短罪》、《乾物女皇》、《愛的魔法》三張唱片,憑上榜歌《短罪》、《微笑的魚》摘下09年度叱咤樂壇生力軍女歌手銅獎。回復自由身,樂瞳想喺歌壇復活:「好多fans留言想我唱番歌,有時我都會用唱K神器,拍唱歌片段放上網,o依家都有公司接觸,佢哋話可以同我出碟,我想有自己代表作,開個音樂會。」
【帶住「電視除」入影圈】
三線發展咁貪心?排序係如何?「影歌視,我未試過電影,所以想將心力放多啲喺呢個範疇,跟住唱番歌,電視係擺最後。」但嗰陣「電視味」咁濃,唔擔心影響進軍電影圈嗎?「我o依家完約,已有幾間新公司同我傾緊,但我想有段真空期,沉殿吓自己,學嘢增值裝備吓,重新出發。畢竟我唔年輕,我想呢行再放多三年時間。」
「我希望呢三年內迫自己做晒唔會後悔,如果有一日我突然要走,不留一點遺憾,起碼我有盡過力,做好演藝事業。」
樂瞳其實做過歌手出唱片,但可能冇乜人記得。(資料圖片)
佢喺07年加入大台簽約成為選下女藝人。(資料圖片)
直到《少年四大名捕》中凌小刀一角大獲好評而加重咗唔少戲份。(資料圖片)