源於英國傳統嘅太平紳士(JP)制度,特區政府回歸後依然沿襲,每年七.一,均委任大棚社會賢達做紳士。呢期公佈嘅名單,唔少乃金融界中人,包括渣打(香港)一哥洪丕正、李國寶細仔兼東亞銀行(023)副行政總裁李民斌。仲有過檔新地(016)做執董嘅前恒生銀行(011)「掌櫃」陳國威,同埋資深財資人兼恒生總經理馮孝忠。
金管局都有兩位女高層膺此殊榮,分別係負責外事部嘅助理總裁朱立翹,同銀行操守助總戴敏娜(Meena)。律師出身嘅Meena,就係當年立法會雷曼聆訊中,坐喺前老闆任志剛旁邊嗰位混血靚女。證監會署理行政總裁林張灼華,亦榜上有名。