今日凌晨黃翠如喺將軍澳出席倒數活動，今晚佢似乎好開心，記者係咁問佢男友蕭正楠嘅嘢佢都好大方回應。

問佢上年係咪搵咗好多?佢話:「應該ok，冇計，冇問經理人幾多錢嘅，但係相信ok啦，因為好感恩，我剛剛喺前一年交稅好甘，係既幾開心嘅。」咁你搵得多過男友?佢立即答:「佢多過我!」記者反問:「你好清楚佢啲數喎。」翠如就開始勁口窒窒同尷尬話:「正常佢多過我嘅。」咁兩個人係財政獨立?佢話係:「我對數字好唔敏感嘅，佢好清楚自己搵緊幾多錢。」問男友大唔大使?佢話:「同我一樣，我都唔大使。」咁有冇送過名貴禮物?翠如就冧爆話:「佢送比我每一樣嘢都覺得名貴。」

問佢結婚之後會唔會由佢管數?佢話:「大家獨立，佢管啦，將來先算啦，其實我哋都唔係一齊咗好耐。」咁會唔會喺2015年發生?佢話:「我相信唔會，我冇諗。」又話係佢同男友第一年同過倒數，問佢聖誕係咪都係首次?佢話係，再問佢過得「平唔平安」?翠如尷尬話:「Okok，我哋好似都有周圍去，啲人好好，喺街見到我哋都講聖誕快樂。」佢話嚟緊成日會同男友蕭正楠一齊出嚟，因為兩個人合作拍劇會拍住宣傳，希望希望套劇收視好，就係最好嘅禮物，又話套劇製作細，笑言最大卡士係曹永廉。

問佢2014年覺得最大收穫係咩?係咪戀情?佢話:「好多嘢嘅，佢係其中一個，好多都好感激，又攞咗獎，公司對我好好，o依家好幸福。」