冠軍級騎師莫雷拉回師香港賽馬後，暫得三Win，成績未算太好。

不過雷神回歸，直接激起潘頓大爆發，佢喺剛周日（16日）停賽前狂贏五場，仲要幾乎匹匹頭馬偏冷，全因有雷神幫手轉移馬迷視線，反觀雷神當日埋單只贏一匹大熱「以奇用兵」，捧佢場的粉絲幾難贏到錢。

其實以雷神騎波士蔡約翰馬匹的成績計，根本一啲都唔算差，「神州威龍」、「請跟我來」出擊都有第二，質素不及對手，冇計！

馬圈輪流轉，話唔定今晚（19日）雷神就嚟一個大翻身，事關佢老細阿蔡部署啲馬跑泥地，一向求贏多過求減分，加埋宿敵潘頓開始停賽，前者亦係時候威番次。

今晚蔡約翰出五駒，報名王牌就用咗喺第四場「旋風腿」同第五場「八心之友」身上；前駒今季曾於泥地1200米同「怪獸都巿」串Q，後駒現處第三班，而「旋風腿」仲只係45分，換雷神冇理由仲差過祈普敦啩。

反而「八心之友」向來孭重磅麻麻，同雷神亦好似唔多夾，所以要睇賠率做人。

若數泥地績最強一定係第六場「架勢」，但問題係本身上咗第三班之後，只得過一次第三，今勻優勢只係全場孭最輕磅兼排第2檔出閘。

至於第七場「激賞」上場跑泥突如其來有第二，但今晚同場有泥地王「藍天堡馬」，肯定係一場硬仗。

外線馬方面，雷神頭三場依次所騎的「萬霸駒」、「樂多福」及「萬馬歡騰」，全部都係幕後好恨贏的未勝馬；前兩駒泥地上過名有根據，臨場如非賠率太低，照計都可以捧場。