立法會今日請來前任同現任議員喺宴會廳午餐，前立法局主席黃宏發、詹培忠、林大輝、吳亮星、劉慧卿、周梁淑怡同程介南等等各不同黨派議員都有出席。

約廿年前曾經係黃宏發中大政政系學生嘅民主黨林卓廷，今日就同老師發叔好好傾，笑指發叔過去教書時，可能因為立法局公務繁忙，走堂仲多過自已，又成日喺學校貼張紙，寫住：「發叔有要事，下次補堂」，其他同學亦同發叔一樣走堂，惡性循環下，試過有次原定120人上嘅堂，最終只有佢一個同發叔出席，變成兩個麻甩佬去中大聯合書院Canteen撐抬腳。

今日撞正74歲生日，仍健步如飛同好好氣嘅發叔更大談修改《議事規則》，喺立法會咪兜接受訪問，講足近30分鐘。唔少行家聽完都覺得好似喺學校上完一堂，阿廷就相當識做，事後幫老師斟水飲，再送發叔離開立法會。