港交所（388）下星期三（20日）舉行股東會，雖然無人出嚟挑戰兩位要競選連任嘅獨立非執行董事郭志標同李君豪，但聽講李君豪嘅選情有暗湧，事關專門向機構投資者畀投票意見嘅獨立機構ISS，建議港交所嘅基金股東投票反對李君豪連任，李君豪可能要喺未來幾日爭取時間積極拉票先得。

ISS籲基金反對

根據港交所公司章程，競選連任嘅董事，所得贊成票要多過反對票先可以連任，即係話，除咗要得人愛戴，亦唔可以乞人憎。如果真係選唔到，令到董事出缺，就由港交所董事會委任一位人兄做住一年董事先。
ISS建議港交所嘅基金股東反對李君豪連任，原因係李君豪曾經擔任爆咗煲嘅海域集團獨立非執董，海域爆煲之後，高等法院喺07年向包括李君豪在內15名董事，就佢哋違反法定、監管或其他責任，存檔同發出傳訊令狀，但兩年後，李君豪已經喺傳訊令狀嘅被告人名單中被刪除，件事同佢無關係。
聽講港交所都有做嘢，回番封電郵畀ISS，就ISS部份講法作出回應，搞番清楚海域單案嘅來龍去脈。查實ISS喺李君豪3年前競選連任嗰陣，亦都叫過港交所嘅基金股東反對李君豪連任，但就唔成功，今次係再接再勵再嚟過。
查實李君豪都做咗11年港交所董事，連唔連到任佢都無乜計較，之但係，點解ISS要咁樣啄住佢唔放呢？華華都好想知。