甄詠珊、安俊豪、「牛雜妹」李美琪、瑪姬等噚晚喺尖沙嘴出席香港物業管理聯會晚會，李美琪一改平民作風，穿上紅色tubedress加襯4吋高踭鞋，不過佢似乎唔係好習慣，出場時同甄詠珊一齊蹺住安俊豪臂彎，但行到好唔自然，仲貼近安俊豪疑似胸壓對方，安俊豪笑言：「feel唔到喎！」

李美琪就解釋：「我係女漢子，好少着高踭鞋，加上我較嬌小玲瓏，條裙長咗我又怕『kick』親。」佢話自己平時做開粗重嘢，o依家要學做女人，問有冇學過跳鋼管舞增添女人味？佢話﹕「或者會試吓，希望可以練到馬甲線就可以着bratop出街。」而甄詠珊自爆冇化妝時被人影到同發展中男性食飯，佢話係了解中：「我平時出街都唔化妝，如果對方接受到我素顏係好。」另提到鄭敬基日前做通波仔手術，好友瑪姬話暫時唔敢搵對方，想俾多啲時間佢休息。