唔少港人喺國安法嘅低氣壓下，對前景完全失去希望，但有人偏偏喺亂世中，先至搵到真愛。繼岑敖暉低調同女友入紙排期註冊後，社運界又傳來另一核彈級喜訊，就係超級資深社運人士、社民連前議員長毛梁國雄亦已入紙排期結緍，對象係社運路上多年緊密戰友、該黨副秘書長陳寶瑩。

根據婚姻註冊處公開資料，長毛同寶瑩係同年同月生，同樣63歲，寶瑩大長毛25日，兩人同樣離過婚。八方問過長毛結婚一事，佢就話不作評論，似乎同早前因參加民主派初選而被警方以涉違國安法拘捕嘅岑敖暉一樣，想保持低調。

呢單係社民連近期第二宗喜事，長毛「徒弟」黃浩銘去年12月5日擺酒結婚，當時長毛罕有着上西裝到賀，估唔到事隔個多月就輪到佢傳喜訊。

睇返資料，長毛同寶瑩喺香港民主路上同行超過10年，其間寶瑩做過長毛嘅立會議員助理，亦多次因參加社運、包括到領展總部抗議而一齊被告。長毛冇做立法會議員後，寶瑩亦經常喺抗爭現場同長毛一齊現身，亦試過一齊主持社民連網台節目。

另外，除咗因為初選被捕外，長毛仲有官司在身，去年被警方指控煽惑市民7.1參與非法集結，獲准保釋候訊。

李八方