上次重心圖像昆士柏流浪又失手，走勢表終於要L多過W，但盈餘卻因保險注利物浦「客勝」串雷丁又中正而繼續攀升，上到6巴仙咯；唔信重心之選屢成毒藥，決用英甲至愛嘅列斯聯，返聯賽主場乘勢殺低哈特普爾作主打。

強隊好賠率不要放過

小弟在擂台與牽牛及畢傑兄鬥得激烈互有領先，較早時得靠列斯聯喺連輸3口盤後，在足總盃首圈重賽作客以5:2大炒諾咸頓而再居首，列斯聯當時賽前票數軟弱（「讓球主客和」的「客勝」逾4倍），啱晒本人一向作風，終一鋪本利歸還。一直強調有力爭標嘅強隊有好賠率，不出擊待何時？與兩周前阿仙奴贏曼聯、上周捧雷丁作客打低錫菲聯，理念同出一轍，暫時唔使好似一啲著名財經分析員，經過這次百年難得一見嘅金融海嘯後，撰文悲嘆識嗰樣死嗰樣，而且跌市自恃有信心唔止蝕，輸得仲大鑊；賭波通常都係雞仔注，我仍抱強隊要長追，有分頭更不會錯過態度，都叫搵到食，又冇諗過一鋪翻身，自我感覺仍然良好喎。

阿仙奴雷丁「大」互串

自我感覺良好，梗係要續追列斯聯同雷丁，先講列斯聯，上仗贏在再次擔正嘅入球機器碧福特中三元得以反底成功。其實近戰每次都係壓住對手嚟踢，只不過前鋒把握唔到，今次對下游兼作客輸波必無波入嘅哈軍，未必再能大勝，但班波信心返嚟，博列斯聯贏2:0。
保險注近期成我的護身符，今次博兩場入球「大」，實在不忍見阿仙奴輸畀主場嘅曼城，但今場真係有危機，兩隊攻力強後防差，入球「大」極穩；串埋雷丁主場迎或會再降一級嘅修咸頓，但W無肉食，不過修頓班𡃁仔入到波，博「大」亦屬合埋之選。
近5場往績：LLWWL
是日投注：$1,700
本金＄100,000（上次賺蝕+$420）
結餘：$104,319

蘋果波神
水準有目共睹，長跟必有着數。