中共出動到外交部發言人華春瑩「推薦」嘅國產科幻電影《流浪地球》，喺內地係威係勢大收近45億元人仔，不過香港票房就好唔掂，之前內地官媒《環球時報》報道，《流浪地球》開畫後，旺角百老匯影院試過賣得七張飛，搞到民建聯、工聯會等要撲出嚟加入拯救《流浪地球》行列，大搞廿蚊包場催谷票房，不過似乎冇乜作用，最近就有網民貼咗一張《流浪地球》3號星期日戲院網上售票貼圖，成場連一張飛都冇人買，可謂奇景。

被指抄襲1962年日片

好多網民日前係網上貼出剛過去嘅星期日，旺角百老匯影院8點場《流浪地球》網上售票情況，張圖顯示全部座位一片綠，即係一張飛都買唔出，有網民揶揄零票房唔算奇，但一套內地收近45億元人仔、又吹噓到足以同荷李活科幻電影比拼嘅「大片」，竟然淪落到同爛片一樣命運，呢個先係奇景。

之後陸續有網民貼出《流浪地球》喺不同戲院不同時段只賣出幾張飛嘅售票截圖，又有人貼《流浪地球》疑似抄1962年日本電影《妖星哥拉斯》嘅報道，揶揄一定係日本人坐時光機去抄襲中國電影，有網民直頭話《流浪地球》快趣落畫，否則Captain Marvel上畫後，可能每一場都係零票房喎。