前日本組合SMAP成員香取慎吾今午現身中環，為其作品「大口龍仔」於中環些利街與荷李活道交界嘅半自動扶手電梯旁牆身主持揭幕儀式，吸引近百粉絲到場。

揭幕儀式後，香取接受傳媒訪問，提到首次以藝術家身份到港，佢話估唔到有機會衝出日本，來到香港繪畫一幅咁大嘅作品，日後佢亦想嘗試唔同挑戰。香取去年中曾為節目錄影訪港，佢提到當時認識到旅遊發展局人員，而促成今次合作機會，被問到有否計劃來港辦粉絲見面會，香取話：「香港粉絲相當熱情，有時間都想交流。」

香取今次來港忙於通宵畫畫及出席揭幕活動，佢話冇乜時間旅遊觀光，但有去飲茶同打邊爐。被問到想唔想再來港錄影節目，香取話：「有機會都想。」至於被問到有冇留意香港電影，及有冇想合作嘅藝人，香取話最想同成龍合作：「我20年前來港拍電影時，在酒店收到成龍送上的花，今次來港成龍亦有送花到酒店給我。（有冇機會同成龍食飯？）冇，我都想。」

完成活動後，香取於下午近3時坐車直達機場離開，機場派出數名保安與航空公司人員護送佢步入閘口，並有十多名粉絲追到機場。香取沿途友善同粉絲交談，到閘口前香取自動提議和粉絲自拍，先至入閘離開。

精選娛聞，喺晒《娛果》
http://fb.com/appledailyent