今日係驚蟄，民間有打小人嘅傳統。言行比前輩王國興誇張10倍嘅工聯會「醬爆」陸頌雄，又喺社交網站上喊打喊殺，聲稱打小人可以心情舒暢、鍛煉手部肌肉，而為咗教大家用智能電話打小人，佢就攞咗美國駐港總領事唐偉康嚟做「人辦」。嗱嗱嗱，相對民建聯冒住黃雨去美領館門口請願，醬爆就咁用手機打飛……打小人，好似hea啲喎！

陸頌雄今日喺自己個facebook專頁教人用個打小人app，但最基本嘅Link都冇提供，唔知佢個app喺邊度下載嘅呢？但佢就整咗幅圖做教學，話先要影低個小人樣、寫埋名，然後跟口訣同節奏搖動，或者拍打部電話，直至小人面部扭曲先算大功告成。至於點解要用唐偉康？佢就話因為唐偉康「衰多口」。

唔少連登網民都討論醬爆呢個post，八方幾欣賞當中兩個，第一個係引述外交部駐港特派員公署網頁中有關「外交特權與豁免」嗰版，提到根據《維也納外交關係公約》規定，「接受國對外交代表應示尊重，並應採取一切適當步驟以防止其人身、自由或尊嚴受有任何侵犯」，第二個係有網民大讚工聯會終於文明咗，「唔用菠蘿」。

陸頌雄出po幾個鐘頭後，美國駐港總領事館在facebook上載一幅在鵝頸橋拍攝嘅相，似乎係今日拍攝，可見打小人攤檔，美總領館寫上：「千祈唔好打錯人呀！」唔知係咪提醒工聯會唔好犯陳勇嘅錯，美、英不分！

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb