《三個女人一個因》繼續成為大家嘅話題之作，黃智雯演三個人格得到唔少觀眾嘅讚賞，而袁偉豪喺劇中所扮演嘅搞笑人格，亦十分討好。不過喺電視劇當中出現嘅人格分裂症患者，多數都唔係好人。我最深記憶嘅，就係2000年嘅《陀槍師姐II》——鮑國平。

膽小怕事嘅鮑國平（駱達華 飾），細細個就被勾佬嘅大嫂要脅要殺死佢。好朋友翁文成死咗之後，就人格分裂出呢個朋友出嚟。後來變本加厲，發展出嚟嘅翁文成人格，反射出大嫂對鮑國文長期造成嘅壓力，所以要姦殺晒天下間嘅不忠淫婦。主角之一嘅陀槍師姐陳三元（滕麗名 飾）接受放蛇任務，雖然最後成功捉到翁文成，但係三元就被施暴強姦。

呢段真係經典，至今都歷歷在目。尤其是當年喺劇中飾演夫妻嘅滕麗名同魏駿傑，喺現實當中係男女朋友關係，所以我睇得特別投入肉緊。記得當年啲朋友仔一見到戴漁夫帽嘅人就會講笑話係鮑國平，就知道套劇同角色嘅滲透力係幾咁強大。當年套劇同呢一幕有好好嘅收視，駱達華亦都憑住兩個極端人格嘅出色演繹而人氣急升，到今時今日大家都應該記得佢呢個作表作。

滕麗名依家就繼續喺大台拍劇，喺《開心速遞》已經做人阿媽。駱達華就喺上海定居，拍內地劇。唔知有冇劇組可以搵佢傾吓，叫佢返嚟拍吓港劇呢？

專欄作者簡介：
方以文
電視迷，未成精。睇好電視。

Facebook link：
https://www.facebook.com/fongeman/