【韓流】同T.O.P吸食大麻 韓瑞希判有期徒刑3年緩刑4年
T.O.P韓瑞希
韓國天團BIGBANG嘅29歲成員T.O.P今個月頭被爆喺寓所吸食大麻,同場更有年約21歲女練習生韓瑞希,事件爆出後轟動全城,T.O.P早前更疑因壓力過大,服食過量藥物而陷入昏迷,日前已離開ICU,轉到其他醫院接受精神方面嘅治療。而T.O.P因為吸食大麻,所以亦遭到檢方起訴,案件將於本月29號審訊,因為係刑事案件,T.O.P到時亦要親自上庭。
至於與T.O.P一齊吸食大麻嘅韓瑞希,今日就喺首爾地方法院接受一審判決,根據韓國緝毒法,韓瑞希被判處3年有期徒刑,緩刑4年執行,同時要接受120小時嘅藥物治療,並罰款87萬韓圜(約6,000港元)。
法院方面指韓瑞希購買大麻同時吸食確實有罪,不過因為佢明白當中錯誤並且進行反省,加上考慮到韓瑞希嘅年紀,所以就判以緩期執行嘅判決。