反高鐵人士上周五、六一時突襲禮賓府、一時包圍立法會圍困鄭汝樺，吓吓擊中要害，煲呔結果嬲到變臉，破口大罵示威者。其實政府部門一早做咗幾個部署，諗定示威者可能有乜行動，度定一連串應變方案。原來有關部門估計過反高鐵人士可能衝擊中聯辦，一早喺西環做好部署，反而冇諗過佢哋會操上禮賓府。咁睇嚟，邊度先係香港權力核心，大家心中有數。
據八方了解，警察、消防等政府部門，一早傾過當日點樣應變。佢哋估計，示威者或者會燒嘢，又諗過現場咁多人，一旦有乜混亂，最壞情況可能會出現人踩人意外，所以做咗個兩級應變方案。立法會議員開會期間，唔少警車、消防車、救護車其實隱藏喺中環附近，以便一有事故，即時出動。有紀律部隊高層話，如果當時有示威者燒嘢，只要唔係燒到人，都會盡量由得佢哋宣洩吓情緒。

煲呔面目無光

參考過元旦大遊行經驗，紀律部隊知道西環先係特區政府老細，自動出兵喺附近保護主子，嚴防示威者會再衝擊中聯辦。點知80後嘅行動真喺估佢唔到，上星期五晚財委會休會後，直接帶隊殺上禮賓府叫煲呔出來面對群眾。警察全冇準備，惟有喺開路時不斷帶示威者遊花園，諗住拖延時間增兵佈防。
點知警察都係趕唔切增援，示威者好快就成功殺到禮賓府門口，搞到煲呔面目無光。到咗第二日嘅集會，示威者下午26步一跪苦行上政府總部，一班警察好緊張，好想知道示威者係咪會再次殺上禮賓府。結果，400人和平抵達政府總部，但行政署就驚到大閘都唔肯開。

又係錯估形勢

嗰晚示威者包圍立法會，大批手持盾牌嘅防暴警察喺花園道一帶殺返落昃臣道救駕，相信又係錯估形勢，誤以為示威者會再上禮賓府，所以喺禮賓府一帶駐重兵，點知反高鐵人士今次淨係包圍立法會，圍困鄭汝樺，搞到呢班防暴警要四圍撲。
mailto:[email protected]