香港首屆單車節,吸引咗唔少政商界名人捧場,贊助活動嘅新鴻基地產高層空群而出,親自落場踩返轉,包括噚晚出戰完「總裁慈善單車遊」後,今日再挑戰10公里組別嘅主席及董事總經理郭炳聯,以及參加咗35公里嘅新地執董、郭炳江公子郭基煇Adam。
八方之前預告過,Adam為咗呢次破風,搵咗專人做教練,過去三個月,拍住同樣接受特訓嘅新地同事踩遍各區備戰。今日正式上陣,Adam一早到場蓄勢待發,期間仲同商經局局長蘇錦樑等有講有笑,以輕鬆心情應戰。
雖然踩車不是求分數,但佢講過希望一個鐘內完成。結果呢?據聞時間係一個鐘18分鐘。咁係咪唔達標?又唔可以咁講喎,皆因賽事中途暫停過約15分鐘,又一如唔少參加者所言,期間人多塞路兼有車,扣除呢啲問題,查實未必需要一粒鐘,難怪八方聽聞Adam都滿意呢個破風戰績。
其實大會今次仲喺尖沙咀文化中心附近設約1公里長嘅賽道,畀細路仔、青少年同家庭參與單車樂,由小童群益會邀請60個基層家庭參與,郭基煇都有去同佢哋合照,打成一片。