世界上最受歡迎嘅老人家，如無意外，應該係佢──聖誕老人！

4歲就嚟香港定居嘅瑞典人聶安達(Anders Nelsson)，唔單止係資深音樂人，佢更加係「聖誕老人」，由17年前開始探孤兒院扮聖誕老人，跟住為許冠傑太太做義工嘅麥當叔叔之家扮聖誕老人向病童送暖，佢話前前後後扮過200、300次。

今個聖誕節，《蘋果》搵咗聶安達示範點樣扮聖誕老人，由着褲後裝大肚腩，跟住到着鞋着衫黐鬚同化粧，成個過程10分鐘搞掂。聶安達話佢套聖誕老人衫係喺美國洛杉磯訂造，要成1000蚊美金，至於啲胡鬚，係許冠傑太太喺美國三藩市幫佢買。訪問當日，聶安達落商場逛咗個圈，唔少大朋友小朋友見到聖誕老人出現，都開心都拉住佢影相。

講到扮聖誕老人，聶安達話佢多數係為做慈善，但10年前佢亦曾經試過喺廣州為一間公司嘅聖誕party扮聖誕老人，令佢留低一個相當難忘嘅經歷。聶安達話:「有次喺廣州一間公司Christmas party，有個50幾歲女仕直頭非禮我呀，伸隻手入我啲衫度話：『睇你有乜禮物比我！』直頭嚇親我呀，影相時佢隻手擺入去....」擺入邊度？係咪下身重要部位？聶安達話:「係呀！我即刻閃開啦，周圍啲人笑，我就費事破壞氣氛嗌非禮叫警察，但唔係幾開心，搞到咁樣，可能佢貪玩，可能飲咗兩杯，睇佢係咪真嘅男人。都有10年，我唔記得邊間公司，我又唔會嘈，但覺得唔係太開心嘅事。」

但當年扮聖誕老人絕大部份都係開心時刻，尤其係兩年前佢為一個慈善活動扮聖誕老人時，有位智障小朋友攬住佢，令佢好感動。聶安達話:「其他小朋友排隊，我停一陣間抖抖，佢就衝埋嚟攬實我話:『聖誕老人我好愛你呀！』我而家諗起都流眼流。」講到呢件事，聶安達真係忍唔住喊出嚟。至於另一難忘事，就係佢3、4年前曾經訓練過一位叫Santa Banana嘅聖誕老人參加瑞典舉行嘅世界聖誕老人大賽，教佢手勢同點用瑞典話介紹自己係香港聖誕老人，結果對方真係贏咗攞冠軍。

聶安達話扮聖誕老人最大滿足感，係啲小朋友衝埋嚟攬住佢話:「Santa Clause l love you！」問佢有乜嘢心得？聶安達就話有啲小朋友未見過「毛晨晨」嘅西人，所以要盡量氹佢哋，又話:「我覺得第一樣嘢係要好愛小朋友，我同太太冇小朋友，但係好中意人哋啲小朋友，我見過有啲扮聖誕老人嘅好似做戲咁，好似唔係好sincere，唔係喺個心度攞啲emotion出嚟。」

問佢做聖誕老人係咪食嘢同去厠所都好唔方便？聶安達話:「係呀，食嘢要之前食到啱啱飽，可以挨4至6個鐘唔會肚餓，盡量唔需要去廁所，因為差唔多要除衫先至可以去到(廁所)，又要含住啲糖，兩個原因，一個係自己要keep番啲energy，第二個原因要冇口臭，小朋友坐到咁埋，佢望上去會話:「『呢個uncle個口好臭架。』所以要含住啲薄荷糖。飲水濕一濕個口，用飲管飲。」

聶安達話好多地方都有聖誕老人訓練班，上第一堂係教聖誕老人雙手要比人哋睇到「always keep your hand visible」，唔好收埋，免得被人話鹹豬手唔知放喺邊度。佢又話:「試過小朋友會驚，又試過坐喺大脾瀨尿，條褲濕晒，所以我有兩條褲喺度，肚dum有3、4個，試過BB嘔咗落身。」

場地:The ONE

更多娛聞，喺晒《娛果》
http://fb.com/appledailyent

【聖誕搞邊科(4)】毛冷雪人裝飾聖誕樹 周汶錡母子溫馨Kiss
http://bit.ly/2CWqF8P
【聖誕搞邊科(3)】短髮性感過長髮 心悠BB聖誕節冇人約？
http://bit.ly/2kVtfEJ
【聖誕搞邊科(2)】「釣金龜」要乎合三個條件？何傲兒嬲豬﹕我真係唔係睇錢
http://bit.ly/2kUkB9i
【聖誕搞邊科】天佑搵Miss Hunny學玩「波波」 又南首次施法即搞掂
http://bit.ly/2DmZV2a